وہ  گڑیا کون سی ہے جوتمہارے شعر میں نظم و غزل میں

ریشمی لہجے میں آنکھوں کی زباں میں اور دھڑکتے دل کی ہردھڑکن میں

ہر لمحہ بسی ہے جو

اور

 گلابوں کی طرح جس کا ہر اک عُضوِ بدن نازک ہے اور نرم و ملائم ہے

وہ گڑیا کون سی ہے جس کے بارے میں تم اتنا سوچتے ہو اورلکھتے ہو

جسے اپنے خیالوں اور خوابوں میں سجاتے ہو

جسے اپنا بنانے کو ترستے ہو ، مچلتے ہو ،  تڑپتے ہو

گُھنی زلفیں ، کنول آنکھیں ،حسیں پلکیں

نجانے اور کیا کیا شان میں اُس کی قصیدے لکھتے رہتے ہو

جسے تم چاہتے ہو ، پوجتے ہوحِرزِ جاں جس کو سمجھتے ہو

وہ جس کی اِک نظر سے آسماں سے ٹوٹ کر گرتے ہیں تارے

اور جس کی دید کے جلوے کی خاطر ہر کوئی بیتاب ہوتا ہے

چلے راہوں پہ تو رستے مہکتے ہیں

کہو اے وقت کے شاعر

وہ گڑیا کون سی ہے  ؟